OKB: Të zhbllokohen eksportet ruse që nuk janë subjekt i sanksioneve

Sekretari i Përgjithshëm i OKB-së, Antonio Guterres, ka bërë thirrje për të zhbllokuar eksportet e ushqimeve dhe plehrave kimike ruse që nuk janë subjekt i sanksioneve.

Kjo kërkesë bëhet e ditur nga një njoftim për shtyp nga OKB-ja, që citon një fjalim të Guterres të mbajtur në Stamboll, në qendrën e ngritur për të koordinuar eksportet e drithërave nga portet e Ukrainës, që nisën më 1 gusht.

”Të mos harrojmë se ajo që ne shohim këtu në Stamboll dhe Odesa është vetëm pjesa më e dukshme e zgjidhjes. Pjesa tjetër e kësaj marrëveshjeje është një akses i papenguar në tregjet globale të ushqimit dhe plehrave kimike ruse që nuk u nënshtrohen sanksioneve”, deklaroi Guterres.

”Është e rëndësishme që të gjitha qeveritë dhe sektori privat të bashkëpunojnë për t’i nxjerrë në treg. Pa plehra kimike në vitin 2022, nuk mund të ketë ushqim të mjaftueshëm në vitin 2023”, tha Guterres.

”Mbi 650 000 tonë grurë dhe produkte të tjera ushqimore tashmë janë në rrugën e tyre drejt tregjeve të botës”, tha ai, lidhur me marrëveshjen e arritur në Stamboll mes Turqisë, Rusisë, Ukrainës dhe OKB-së për të zhbllokuar eksportet e drithërave nga portet e Ukrainës./ansa