Keller-Sutter: Refugjatët ukrainas, të integruar më mirë se grupet e tjera

Me 11%, krahasuar me grupet tjera të refugjatëve me një normë punësimi prej 6%, ukrainasit janë pothuajse dy herë më të integruar në tregun e punës

Ministrja e Drejtësisë, Karin Keller-Sutter, nxjerr një bilanc pozitiv, gjashtë muaj pas vendosjes së statusit të mbrojtjes S: 11 për qind e refugjatëve nga Ukraina tani kanë një punë fitimprurëse, transmeton albinfo.ch. Ky është një numër relativisht i madh.

Krahasuar me grupet e tjera të refugjatëve me një normë punësimi prej gjashtë për qind, ukrainasit janë pothuajse dy herë më mirë të integruar në tregun e punës, është shprehur sot Keller-Sutter për mediat në Bernë.

Sipas ministres, tani duhet shikuar nga e ardhmja. Në qershor, ajo kishte ngarkuar Sekretariatin Shtetëror për Migracionin (SEM) për të hartuar skenarë për kthimin e mundshëm të refugjatëve.

Ministrja e Drejtësisë tha se revokimi ose zgjatja e statusit të mbrojtjes varet vetëm nga zhvillimet rreth sigurisë në Ukrainë, shkruan srf.ch. Sipas saj, minimumi për kthimin e refugjatëve është një armëpushim me zbatim të verifikuar.

Megjithatë, pa koordinim me shtetet e Shengenit, gjithsesi nuk do të ishte e mundur revokimi apo zgjatja e statusit të mbrojtjes, transmeton albinfo.ch. Sipas Keller-Sutter, statusi zviceran S përfshin gjithë zonën Shengen.

---