Serbisë i pamundësohet blerja e naftës ruse

Serbia nuk do të jetë më në gjendje të importojë naftë bruto ruse nga 1 nëntori si pasojë e paketës së gjashtë të sanksioneve të BE-së kundër Rusisë, tha ministrja serbe e Energjisë, Zorana Mihajlovic.

“Serbia do të duhet të blejë naftë nga furnizues të tjerë”, tha ajo.

Serbia tashmë po importon naftë nga Iraku dhe vende të tjera. Importet ruse plotësojnë rreth 50% të nevojave të vendit, 30% sigurohet nga furnizues të tjerë dhe 20% mbulohet nga nafta vendase.

Në korrik, ministria e Energjisë tha se Serbia është në fazën fillestare të negociatave me Azerbajxhanin mbi dërgesat e gazit natyror, duke filluar nga viti i ardhshëm në një përpjekje për të diversifikuar furnizuesit e saj./ Seenews