65 miliardë ndihma ndan Gjermania për qytetarët e saj

Pako e tretë e ndihmave për gjermanët

Para pak ditësh, partitë e koalicionit në pushtet në Gjermani kanë rënë dakord për pakon e tretë të ndihmave. Krerët e koalicionit qeverisës, socialdemokratët e SPD-së, Të Gjelbrit dhe liberalët, FDP u dakorduan për lehtësime dhe ndihma në vlerë prej më shumë se 65 miliardë eurosh. Kjo u bë e ditur të dielën nga publikimi i vendimeve 13-faqëshe të koalicionit. Çmimet e pritshme të larta të energjisë për qytetaret  dhe sipërmarrjet do të ulen përmes masash të caktuara, thuhet në vendimin e koalicionit. “Kjo mbështet ekonominë dhe tregun e punës, sepse qytetaret dhe qytetarët do të vazhdojnë të konsumojnë dhe sipërmarrjet do të investojnë më tej”.

Kjo paketë e tretë masash lehtësuese prej 65 miliardë është më e madhe se të dyja paketat e mëparshme, ka thënë kancelari Scholz (SPD) gjatë prezantimit të masave lehtësuese në konferencën e shtypit në Berlin. “Të gjitha paketat së bashku përmbledhin 95 miliardë euro. “Është shumë ajo që po vemë në lëvizje, por është e nevojshme”, ka thënë Scholz.

Kancelari, Olaf Scholz është shprehur se qeveria do të kujdeset që për qytetarët të ulen çmimet e gazit, naftës dhe qymyrit. Për këtë do të përdoren të ardhura nga mbifitimet e koncerneve energjitike. “Fitimet e rastësishme” të koncerneve do të merren, tha kancelari Scholz gjatë prezantimit të paketës së tretë të masave lehtësuese të dielën. Për këtë qeveria gjermane do të kërkojë një zgjidhje në nivel të BE, por partnerët në koalicion janë të gatshëm që një tatim special të mbifitimit “ta zbatojnë pa vonesë” edhe në nivel kombëtar.

“Ne do t’ia dalim mbanë këtë dimër”, ka thënë Scholz gjatë prezantimit të rezultateve të konsultimit të koalicionit dhe shprehu bindjen, se kjo paketë do të jetë një ndihmë e madhe për qytetarët. “Vendi ynë ndodhet në një kohë të vështirë”, tha Scholz në Berlin, “por ne do ta kalojmë këtë periudhë të vështirë së bashku si vend”.

Për të lehtësuar qytetarët që duhet të paguajnë çmime të larta të rrymës elektrike do të vendoset kufiri maksimal i çmimit të rrymës. “Ekonomive shtëpiake do t’u përllogaritet një masë e madhe energjie me një çmim të leverdishëm (bëhet fjalë për konsumin bazë), kështu që ato do të lehtësohen ndjeshëm dhe mbetet kështu edhe një stimul për kursim energjie”, bëhet e ditur në vendimin e koalicionit.

Në të ardhmen qeveria gjermane do ta orientojë rregullimin e ndihmave të caktuara sociale (Sozialeistungen, shën.red.) me zhvillimin e inflacionit. Scholz bëri fjalë për një ndërrim paradigme. Si masa konkrete lehtësimi do të jenë zgjerimi i numrit të personave që marrin ndihma sociale për banimin – nga 640.000 vetë aktualisht në rreth 2 milionë vetë. Pensionistët nga 1 dhjetori 2022 do të marrin një kontribut energjie prej 300 eurosh. Për studentët do të jepet një shumë një herë prej 200 eurosh. Kurse ndihma sociale (Hartz IV) nga 1 janari 2023 do të riemërtohet në fond qytetar dhe do të merret parasysh inflacioni për ndihmë bazë, duke e çuar atë në 500 euro. Kontributi mujor për fëmijën do të rritet me 18 euro në 1 janar 2023. Koalicioni bëri të ditur se programet e ndihmës për sipërmarrjet do të zgjaten deri më 31 dhjetor 2022.

 

---