Kur pezullohet procesi i vizave për rusët?

Ministrat e Jashtëm të BE-së miratuan rregulla më të rrepta për vizat Shengen për qytetarët rusë gjatë një takimi, javën e kaluar.

Marrëveshja për lehtësimin e vizave midis BE-së dhe Rusisë mund të pezullohet të hënën e ardhshme, njoftoi sot komisionerja e BE-së, Ylva Johansson.

“Ky pezullim do të thotë se qytetarët rusë nuk do të gëzojnë më akses të privilegjuar në BE, për shembull, për qëllime turistike dhe argëtimi”, tha Johansson në Bruksel.

Johansson tha se vendet e BE-së mund të nënshkruajnë zyrtarisht masën përpara fundit të javës, duke lejuar që rregullat e rrepta të hyjnë në fuqi të hënën e ardhshme.

Nëse marrëveshja për lehtësimin e vizave pezullohet, turistët rusë do të përballen me kohë më të gjata të pritjes për vizat e tyre dhe do të duhet të paguajnë një tarifë prej 80 € (79 dollarë) në vend të 35 €.

“Vizat e vlefshme për hyrje do të kufizohen, gjithashtu”, tha Johansson.

Kjo është një tjetër masë ndëshkuese nga BE-ja në përgjigje të luftës së Rusisë kundër Ukrainës.

Marrëveshja e vizave midis BE-së dhe Rusisë ka qenë në fuqi që nga viti 2007. Menjëherë pas pushtimit, vendet e BE-së pezulluan lehtësimet e vizave për biznesmenët, zyrtarët qeveritarët dhe diplomatët.

Johansson njoftoi gjithashtu udhëzimet për lëshimin e vizave të reja pasi lehtësimet të hiqen plotësisht.

“Gazetarët, disidentët, aktivistët e të drejtave të njeriut, studentët dhe njerëzit që lëvizin për arsye familjare mund të udhëtojnë ende në zonën Shengen”, tha Johansson.

 

---