Mehaj publikon shpenzimet e Ministrisë së Mbrojtjes për dreka

Ministri i Mbrojtjes, Armend Mehaj, këtë të shtunë ka publikuar në Facebook shpenzimet e dikasterit që drejton për dreka dhe byfe, ndërsa ka krahasuar me ato të viteve të kaluara.

Bazuar në statistikat e publikuara nga Mehaj, del se Ministria e Mbrojtjes ka shpenzuar 18 mijë e 77 euro për dreka dhe 1 mijë e 158 euro për byfe në periudhën 2021/2022.

Sipas të dhënave, në vitin 2017/2018 nga kjo ministri kishin shpenzuar 32 mijë e 102 euro për dreka dhe 15 mijë e 675 për byfe.

Mehaj mes tjerash ka akuzuar disa media, për të cilat ka thënë se nuk kanë gjetur kohën e mjaftueshme për të promovuar punën e Ministrisë së Mbrojtjes, ngase “më tepër kanë qenë të angazhuar në keqinformimin e publikut, si dhe keqinterpretimin e të dhënave”.

“..dua të ndaj me ta vlera të krahasueshme të cilat sipas vullnetit ndoshta edhe mund t’u shërbejnë për të parë pa ngarkesa ndikimesh anën pozitive të punëve që po kryhen, të cilat padyshim se do të jenë edhe më intensive muajve në vijim, sepse jemi zotuar para qytetarëve se do të fitojmë çdo betejë të nevojshme për të ngritur ushtrinë dhe shtetin në nivelin e pritshmërive të tyre, të krahasueshëm me çdo shtet evropian”, ka shkruar ai në Facebook.