Aterrim emergjent i aeroplanit në Cyrih: “Ndihej një erë e çuditshme në kabinë”

Të 141 pasagjerët dhe ekuipazhi mbetën të padëmtuar dhe po barten në lidhje tjera, alternative

Një aeroplani të kompanisë ajrore Swiss iu desh të bënte një ulje emergjente në aeroportin e Cyrihut herët në mbrëmjen e së hënës (sot), transmeton albinfo.ch. Ekuipazhi i avionit të pasagjerëve kishte vënë re një aromë të pazakontë në kabinë, gjatë fluturimit për në Porto, Portugali.

Sipas Swiss, ulja emergjente shkoi pa probleme dhe askush nuk pësoi lëndime.

Ekuipazhi vendosi të kthehej për arsye sigurie, tha zëdhënësja e Swiss Meike Fuhlrott për agjencinë e lajmeve Keystone-SDA. Kështu ajo ka konfirmuar një raport përkatës të portalit të lajmeve “20 minuten”.

Ulja emergjente ka shkuar pa probleme, ka thënë zëdhënësja. Të 141 pasagjerët dhe ekuipazhi mbetën të padëmtuar. Pasagjerët aktualisht janë duke u bartur në lidhje alternative.

Avioni – një Airbus A220-300 – u ngrit nga Aeroporti i Cyrihut në orën 17:13 dhe ishte rrugës për në Porto, përcjell albinfo.ch. Fillimisht ishte e paqartë se çfarë e shkaktoi erën e pazakontë në kabinë.

---