Parlamenti Evropian votoi për futjen e Kroacisë në zonën Schengen

Parlamenti Evropian ka dhënë miratimin që Kroacia të përfshihet në zonën Schengen të udhëtimit pa viza në Evropë.

Raporti i përgatitur në parlament lidhur me çështjen u miratua me 534 vota pro dhe 53 kundër. Në këtë mënyrë Parlamenti Evropian ka miratuar heqjen e kontrolleve të kufijve të brendshëm mes Kroacisë dhe anëtarëve të zonës Schengen.

“Shengeni e ka pritur Kroacinë. Populli kroat e ka pritur dhe tani ka ardhur ai moment”, tha raportuesi për hyrjen e Kroacisë në zonën Schengen, Paulo Rangel, në debatin e Parlamentit Evropian për këtë çështje.

Nënkryetari i Komisionit, Margaritis Schinas, theksoi se Kroacia, Bullgaria dhe Rumania meritojnë dhe përmbushin gjithçka që është e nevojshme për të hyrë në zonën më të madhe pa kontrolle të kufijve të brendshëm në botë.

“Tani është koha që BE-ja të bëjë atë që duhet të bëjë dhe të thotë vetëm një fjalë: mirë se erdhe”, tha Schinas, duke theksuar se zona Schengen është “xhevahiri në kurorën” e integrimit evropian.

Ai theksoi se Kroacia i kaloi të gjitha vlerësimet dhe testet me “notat më të mira”, dhe vlerësoi veçanërisht krijimin e një mekanizmi të pavarur për monitorimin e veprimeve të policisë në kufi.

Këshilli Evropian më 9 dhjetor 2021 njoftoi se Kroacia ka përmbushur kushtet e nevojshme për anëtarësim në Schengen.

Parlamenti në raportin e miratuar i bëri thirrje Këshillit Evropian të vazhdojë procesin dhe të japë vendimin përfundimtar lidhur me heqjen e kontrolleve kufitare.

Vendimi përfundimtar lidhur me çështjen duhet të merret unanimisht nga Këshilli Evropian i cili përbëhet nga vendet e Bashkimit Evropian.

Aktualisht në zonën Schengen ndodhen 26 vende, të cilat në përjashtim të Bullgarisë, Rumanisë, Kroacisë, Administratës së Qipros Greke dhe Irlandës, përfshijnë vendet anëtare të BE-së si dhe Norvegjinë, Islandën, Zvicrën dhe Lihtenshtajnin që nuk janë anëtare të BE-së. Zona Schengen funksionon vetëm me kufij të jashtëm, pa kufi mes shteteve anëtare./trtbalkan