Vjenë: Humb jetën 45-vjeçari nga Kosova duke vozitur

pixabay

Në mediat lokale të Vjenës shkruhet se në orët e pasditës së ditës enjte, më 10 nëntor, në një nga autostradat në hyrje të Vjenës ka humbur jetën një 45-vjeçar nga Kosova, përcjell albinfo.ch.

Referuar këtyre mediave, kosovari ishte duke drejtuar makinën e tij kur papritmas është ndalur makina e tij.

Pjesëmarrës të tjerë në komunikacion kanë ndaluar që të shohin se për çka bëhej fjalë, kanë ftuar Policinë e Vjenës dhe Ndihmën e Shpejtë, por duket se gjithçka ka qenë vonë.

Në ndihmë ka ardhë edhe një helikopter i Ndihmës së Shpejtë, por pa sukses.

Sipas njoftimeve të para nga mediat e Kosovës, i riu nga Kosova është nga Kijeva, me inicialet B.B i cili ka pësuar sulm kardiak dhe gjatë drejtimit të makinës ka humbur kontrollin. Por, duket se makina ka zvogëluar shpejtësinë deri në ndalje të plotë dhe nuk është shkaktuar asnjë aksident i rastit dhe asnjë përplasje me makina të tjera në komunikacion.

Trupi i të ndjerit është sjellë pa shenja jetë në Spitalin Emergjent të Vjenës dhe policia po heton rastin, ndërkaq mjekët kanë filluar të bëjnë obduksionin e trupit të të ndjerit për të konstatuar shkaqet e kësaj fatkeqësie. /Albinfo.ch