Iniciativë: Zvicra të jetë neutrale në çështjet ndërkombëtare

Iniciativa e Neutralitetit është nisur zyrtarisht në Zvicër

Një grup i ri, Pro-Schweiz, i cili pretendon se qeveria zvicerane po përfshihet shumë në çështjet ndërkombëtare, po angazhohet për një votim për të mbrojtur traditën e neutralitetit të vendit, përcjell albinfo.ch.

Shoqata njoftoi nisjen e fushatës së saj të parë, “Ruajtja e neutralitetit të Zvicrës”, e cila kërkon një amendament të ri kushtetues që do të ndalonte qeverinë të anëtarësohet apo edhe të bashkëpunojë me NATO-n, apo ndonjë aleancë tjetër ushtarake.

Ndërsa Zvicra nuk është pjesë e NATO-s, ajo megjithatë ka lidhje të ngushta me organizatën. Dhe që nga pushtimi i Ukrainës nga Rusia, qeveria zvicerane ka thënë se dëshiron të zgjasë bashkëpunimin si masë sigurie.

Nisma e Pro-Schweiz synon gjithashtu të ndalojë Zvicrën të vendosë sanksione kundër një vendi ndërluftues, siç kishte bërë në rastin e Rusisë.

Shoqata ka një afat deri më 8 maj 2023 për të mbledhur 100,000 nënshkrimet e nevojshme për ta vënë këtë çështje në kalendarin e iniciativave në nivel të vendit.

---