Emigrantët shqiptarë nga SHBA-ja paguajnë borxhin e tërë fshatit në vendlindje

Dy emigrantë shqiptarë në SHBA kanë bërë një gjest human, duke ndihmuar bashkëkombasit e tyre në vendlindje. Bëhet fjalë për Alfred Përgjonin dhe Admir Lufi, të cilët kanë paguar të gjitha borxhet e dyqanit në fshatin e tyre të lindjes, Luf, në Pukë.

Në një lidhje me Skype për ABC ata treguan si e morën këtë vendim pa e ditur shumën.

Ideja ishte e të dyve, unë ia propozova Admirin. Në fakt, kemi vjet që kemi marrë pjesë në një fondacion që drejton bashkudhëtari ynë Fran Gjoka. Meqë është fshati nga ne vijmë dhe menduam t’i ndihmojmë, duke paguar të gjitha borxhet që janë te i vetmi dyqan që është në fshat. Kanë mbetur diku 40-50 familje aty”, tha Alfredi.

“Ne jemi nga një fshat që i njohim të gjitha familjet e fshatit. Megjithatë, vlen për t’u vlerësuar shitësi Vitor Ndocaj, sepse nuk është e lehtë të japësh borxhe, kur e di që një person nuk ka për të të dhënë për ditë të tëra. Edhe bashkë me mikun tim, Alfredit, vendosëm që të bëjmë diçka ndryshe nga ditët e tjera. Edhe vendosëm pa e ditur se sa është shuma, dërguam një mikun tonë dhe kemi marrë listën, edhe duke hapur fletoren, duke bërë llogaritë, i shlyem”, tha Admiri.