Kjo bankë zvicerane ngriu rreth 19 miliardë dollarë të pronarëve rusë

(KEYSTONE/Peter Klaunzer)

Banka Credit Suisse ka lëshuar një njoftim se ka ndërmarrë veprime për të ngrirë mbi 19 miliardë dollarë para ruse në përgjigje të zbatimit të sanksioneve perëndimore, përcjell albinfo.ch.

E gjitha kjo është pjesë e sanksioneve për t’i bërë presion ndaj Rusisë për pushtimin e saj në Ukrainë dhe për të kufizuar qasjen e saj në tregjet financiare globale.

SonntagsZeitung shkruan se disa nga fondet e ngrira i përkasin Bankës Qendrore Ruse ose shtetit rus.

Vlen të theksohet se Zvicra ka qenë një destinacion i famshëm për elitat ruse dhe vende të tjera ish-sovjetike që kërkojnë të çojnë pasurinë e tyre në një vend me rregulla më të dobëta bankare.

Megjithatë, sanksionet e fundit e kanë bërë gjithnjë e më të vështirë që rusët të kenë qasje në sistemin financiar global, me shumë banka perëndimore që tani po mbyllin dyert e tyre për ta.