Kosovë: Pas një përleshje në veri, 2 të plagosur

Në Qendrën Studentore në Mitrovicën Veriore mediat raportuan për një incident, ku për pasojë pas një përleshje mbetën të plagosur dy persona.

Raportohet se viktimat u therrën me thikë nga një i dyshuar, që për momentin ndodhet në arrati.

Ndërsa ministri i Punëve të Brendshme, Xhelal Sveçla, përmes një statusi në Facebook ka njoftuar se ka pranuar informacione nga Policia e Kosovës se në Mitrovicën e Veriut ka ndodhur një incident, me ç’rast dy qytetarë të nacionalitetit serb kanë mbetur të plagosur dhe njëri nga ta ndodhet nën tretman mjekësor, transmeton albinfo.ch.

“Njësitet relevante policore tashmë kanë dyshime të bazuara mbi dorasin e këtij akti, i cili është po ashtu i nacionalitetit serb, pjesëtar i strukturave paralele kriminale të Serbisë”, njofton Sveçla.