Zvicra mbyll ambasadën në Sudan, evakuon stafin

(KEYSTONE/Laurent Gillieron)

Ambasada e Zvicrës në Khartoum, në Sudan, është mbyllur të dielën. Shtatë anëtarët e stafit zviceran si dhe pesë personat shoqërues ishin në gjendje të evakuoheshin në bashkëpunim me vendet e treta, tha FDFA të dielën në mbrëmje, përcjell albinfo.ch.

Stafi i ambasadës dhe shoqëruesit e tyre janë në gjendje të mirë shëndetësore. Dy persona janë rrugës për në Etiopi, pjesa tjetër janë evakuuar në Xhibuti falë mbështetjes së Francës, shkruan RTS.

Departamenti Federal i Punëve të Jashtme shton se vetë Zvicra nuk organizon nisje për shtetasit zviceranë në Sudan, por bashkëpunon me partnerët e saj për t’i ndihmuar ata sa më mirë në rrethana të vështira. Njëqind zviceranë janë të regjistruar se jetojnë në Sudan, tha për mediat në Bernë të premten Serge Bavaud, kreu i Qendrës së Menaxhimit të Krizave në FDFA. Por, jo të gjithë duan të largohen nga vendi, raporton RTS.

Agjencia franceze e lajmeve AFP kishte raportuar më herët, duke cituar burime qeveritare se Zvicra kishte kërkuar ndihmën e Francës për evakuimin e shtetasve të saj. Dy avionë ushtarakë francezë me 200 persona të nacionaliteteve të ndryshme u ulën në Xhibuti, njoftoi Parisi. Gjermania dhe Italia evakuuan secila rreth 100 dhe 300 persona respektivisht, përcjell albinfo.ch.

Të dielën, ministri i Jashtëm italian, Antonio Tajani, njoftoi evakuimin e rreth 200 civilëve, duke përfshirë 140 shtetas italianë, disa zviceranë, disa punonjës të nunciaturës apostolike dhe rreth 20 qytetarë evropianë.

Ambasada zvicerane ndodhet shumë afër aeroportit të kryeqytetit, Khartoum, dhe për këtë arsye është shumë afër luftimeve. Sipas FDFA, punonjësit ishin të mbyllur në shtëpitë e tyre. Shtetasit zviceranë mund të kontaktojnë linjën e ndihmës FDFA (+41 800 24-7-365 / +41 58 465 33 33). Në internet publikohen edhe informacione që evoluojnë sipas situatës në vend, shkruan RTS.