Paga e shefave është rritur, ajo e punëtorëve ka rënë, a bën përjashtim Zvicra?

Pixabay: Ilustrim

Oxfam ka nxjerrë një raport, ku thotë se paga e drejtorëve të kompanive është rritur me 9% ndërkohë që ajo e punëtorëve ka rënë për 3%, përcjell albinfo.ch.

Por, situata është pak më ndryshe në Zvicër, ndërsa ky studim përfshin Shtetet e Bashkuara, Mbretërinë e Bashkuar, Afrikën e Jugut dhe Indinë.

Duke marrë parasysh inflacionin, pagat reale ranë me 2% vitin e kaluar në Zvicër. Sipas të dhënave të mbledhura nga agjencia AWP, ky trend ishte gjithashtu në rënie midis drejtuesve të mëdhenj të biznesit.

Frankie Ng, kreu i SGS, është ai që ka parë uljen më të madhe të shpërblimit të tij, me një rënie prej 36% krahasuar me vitin 2021.

Nga 26 kompanitë e mëdha të marra në konsideratë nga AWP, vetëm shtatë bosët i kanë shpëtuar këtij trendi, shkruan RTS.

Nuk ka ende të dhëna të mjaftueshme për t’u përgjigjur nëse Zvicra qëndron më mirë, por është përgjithësisht mesatare, thotë për RTS, Rafael Lalive, profesor i ekonomisë në Universitetin e Lozanës.

“1% më e pasur në Zvicër fiton afërsisht 10% të të ardhurave totale, që është një masë e pabarazisë. Dhe Zvicra është afërsisht në mes të vendeve të OECD. Çuditërisht, është se në Zvicër, këto pabarazi kanë mbetur konstante gjatë tridhjetë vjetëve të fundit, ndërkohë që në vende të tjera, si SHBA apo Britania e Madhe, këto pabarazi janë rritur ndjeshëm”, shprehet ai, përcjell albinfo.ch.

Në Shtetet e Bashkuara, për shembull, i duhen më shumë se 400 vjet që një punonjës të fitojë sa një shef i madh në 12 muaj, sipas Oxfam.