Masa më të rrepta për pronarët që blejnë veturat e vjetra që ndotin mjedisin

Pixabay: Ilustrim

Dënimet për emetim të dioksidit të karbonit kur importohen makina ndotëse kanë një efekt të kufizuar dhe janë shumë të ulëta. Kontrolli Federal i Financave bën thirrje për përmirësimin e sistemit aktual, i cili madje po rezulton kundërproduktiv.

Në vitin 2020, trafiku rrugor përbënte rreth 40% të emetimeve totale të CO2 në Zvicër. Një nga masat e ligjit për CO2 parashikon nxitje për importuesit që të ofrojnë makina më pak ndotëse, shkruan RTS.

Kështu, vlerat e synuara të emetimeve të llogaritura individuale vendosen në automjetet e importuara. Nëse tejkalohet, shqiptohet një gjobë. Shuma totale e gjobave të paguara është rritur ndjeshëm që nga viti 2018, ndërkohë sipas statistikave në vitin 2021 ajo arriti në 28 milionë franga.

Kontrolli Federal i Financave në një auditim të botuar të mërkurën shprehet se kjo metodë nuk po funksionon, pavarësisht nga një rënie e konsiderueshme, objektivat e emetimeve nuk janë përmbushur, duke rrezikuar arritjen e objektivit të përgjithshëm të legjislacionit të dioksidit të karbonit për kufizimin e ngrohjes globale në më pak se dy gradë, përcjellë albinfo.ch.

Zvicra ka vendosur sanksione të ngjashme me ato të Bashkimit Evropian. Kështu, tregu zviceran nuk është më tërheqës se ai i vendeve fqinje për importuesit e automjeteve me emetim të lartë.

Por, vlerësohet se sanksionimi është i ulët. Falë fuqisë së lartë blerëse në Zvicër në krahasim me jashtë vendit, importuesit mund t’ua kalojnë këtë klientëve.

Një vështrim në vendet fqinje evropiane tregon gjithashtu se masa është plotësuar, në vendet ku operon, me stimuj për konsumatorët. Taksat e vetme mbi regjistrimin, ose rritja e taksës së automjeteve motorike bazuar në emetimet, janë efektive në këtë kontekst, vëren Kontrolli Federal i Financave. Në Zvicër, masa të ngjashme zbatohen vetëm në disa kantone dhe në një masë të kufizuar, përcjellë albinfo.ch.