Escobar e quan Kurtin partner, por ndonjëherë të vështirë

Emisari special i Shteteve të Bashkuara për Ballkanin Perëndimor, Gabriel Escobar, ka deklaruar se kryeministri i Kosovës, Albin Kurti, është partner i tyre, por nganjëherë është “partner i vështirë”.

Në një intervistë për Institutin për Politikë dhe Ekonomi i Evropës Juglindore, Escobar është shprehur se Kosova dhe Serbia janë partnere të tyre.

“Më duhet ta sqaroj, Kurti është partneri ynë. Ai nganjëherë është partner i vështirë, por është partner. Kosova është partneri jonë. Serbia është partneri jonë. Kështu që në të ardhmen, ne duam t’i përdorim marrëdhëniet e mira që kemi me Kosovën dhe përmirësimin e marrëdhënieve që kemi me Serbinë që të gjejmë një rrugë të pranueshme dhe me beneficione për të dyja, që të mund të jenë pjesë e BE-së”, ka thënë Escobar.