Grevë e hekurudhave në Itali e në Gjermani bllokohen aeroportet

unsplash

Trenat pa lëvizur dhe bagazhet e vendasve dhe turistëve të mbushur me durim. Trafiku hekurudhor në Itali u çorodit seriozisht ditën e enjte si pasojë e një greve njëditore të punonjësve.

Thuajse gjysma e udhëtimeve në distancë të gjatë janë anuluar, pasi punëtorët kërkojnë rroga më të larta, kushte më të mira pune dhe më shumë trajnim.

Edhe pse greva ishte programuar të zgjaste deri mesnatën e së premtes, ministri për Infrastrukturën dhe Transportet, Matteo Salvini urdhëroi reduktimin e saj deri mesditën e së premtes.

Ndonëse në rrethana të ndryshme, probleme me transportin pati edhe në Gjermani, ku aeroportet e Hamburgut dhe Duseldorfit ndërprenë përkohësisht fluturimet.

Shkak u bë një protestë e aktivistëve të klimës të grupit “Gjenerata e Fundit”, të cilët çanë gardhet me tela të dy aeroporteve dhe bllokuan aksesin në strukturat e udhëtimit.

Ata u vendosën në afërsi të pistave të fluturimit, duke detyruar autoritetet të pezullojnë fluturimet për motive sigurie.

Aktivistët e grupimit “Gjenerata e Fundit” njihen për nguljen e tyre në tokë në rrugët dhe infrastrukturat publike të Gjermanisë.