​Dukagjini dhe Drita luajnë sot në Evropë

Dy përballje të vështira, Skuadra gjilanase do të ketë punë me skuadrën nga Republika e Çekisë, Viktoria Plzen

Liga e Konferencës vazhdon sot, ku pas Ballkanit, dy skuadra të tjera kosovare zbresin në fushë për të luajtur në rrethin e dytë.  Drita dhe Dukagjini janë dy ekipet e tjera kosovare që luajnë në Ligën e Konferencës dhe sonte në mbrëmje zhvillojnë ndeshjet e radhës, përcjell albinfo.ch.

Fillimisht nga ora 19:00, Drita do të zbresë në fushën e stadiumit “Doosan Arena” në Plzen, për t’u përballur me gjigantin çek Viktoria Plzen. Vendasit janë favorit në letër, mirëpo gjilanasit kanë udhëtuar për këtë takim që të marrin rezultat pozitiv.

E një orë më vonë, në stadiumin ‘Fadil Vokrri’ në Prishtinë do të fillojë dueli mes Dukagjinit dhe HNK Rijekës. Klinasit pasi kaluan me sukses raundin e parë, do të synojnë të bëjnë të njëjtën gjë edhe në të dytin. Synimi i skuadrës klinase është që të shfaqë lojë të bukur dhe ta befasojë skuadrën e madhe kroate që gjithashtu është favorit në letër.

Aventurën në këtë kompeticion e nis sot edhe nënkampioni i Kosovës, Drita. Skuadra gjilanase do të ketë punë me skuadrën nga Republika e Çekisë, Viktoria Plzen. Ndeshja e parë luhet në Çeki, sonte me fillim nga ora 19:00.

---