Mbi 3% e popullsisë zvicerane, cak i krimeve të urrejtjes

Pixabay: Ilustrim

Më shumë se 3% e burrave dhe grave zvicerane thonë se kanë qenë viktima të “krimeve të urrejtjes” në vitin 2021, kryesisht në formën e fyerjeve, zbulon për herë të parë “Crime Survey 2022”.

Ky studim ofron për herë të parë të dhëna përfaqësuese për Zvicrën mbi “krimet e urrejtjes”, vlerësohet nga Konferenca e Komandantëve të Policisë Kantonale (CCPCS), e cila autorizoi sondazhin.

Termi “krim i urrejtjes” është një formë krimi i bazuar në paragjykim, sipas autorëve të studimit, në të cilin janë intervistuar më shumë se 15.500 persona. Këto paragjykime mund të përfshijnë ngjyrën e lëkurës, orientimin seksual, fenë ose kombësinë, shkruan RTS.

Ky lloj krimi prek midis 3.4 dhe 14.3% të popullsisë në varësi të metodës së përdorur, thonë studiuesit. Ata besojnë se është mjaft i përhapur në Zvicër sa nuk mund të injorohet.

Oficerët e policisë ndërgjegjësohen për temën e krimit të urrejtjes gjatë trajnimit dhe zhvillimit të tyre, shpjegon Mark Burkhard, president i CCPCS, përcjell albinfo.ch.

Rezultatet për krimin e urrejtjes janë pjesë e sondazhit të fundit të sigurisë, i cili u krye nga Universiteti i St. Gallen dhe Universiteti i Shkencave të Aplikuara të Cyrihut (ZHAW), në emër të CCPCS. Studimi i fundit daton nga viti 2015.

Sipas rezultateve të sondazhit, krimet e pronës, si vjedhjet dhe grabitjet, janë ulur nga viti 2015, ndërsa më shumë njerëz janë prekur nga krimi kibernetik.

Një total prej 6.2% e të anketuarve thanë se ishin viktima të krimeve në internet, si hakimi ose humbja e të dhënave, keqpërdorimi i informacionit të kartës së kreditit ose ransomware. Megjithatë, 90% e krimeve online mbeten në hije, sepse nuk raportohen në polici, shkruan RTS.

Veprat e krimit kibernetik vijnë të dytat në klasifikimin e veprave të identifikuara si më të shpeshtat në kontekstin e anketës, pas mashtrimit (8.4%).

Studimi gjithashtu tregon se 92.4% e të anketuarve i besojnë policisë, që do të thotë se “besimi i popullatës zvicerane në polici mbetet i qëndrueshëm në një nivel shumë të lartë”, thuhet në deklaratë.

Më shumë se tetë në dhjetë zviceranë kanë treguar gjithashtu se ndihen të sigurt në Zvicër, vlerë kjo që është rritur ndjeshëm në krahasim me vitin 2015, shkruan KKPK, përcjell albinfo.ch.

Sipas CCPCS, qëllimi i studimit është të kuptojë ndjenjën subjektive të sigurisë së popullatës zvicerane, qëndrimin e tyre ndaj policisë dhe përvojën e viktimave të krimit.

Duke qenë se disa nga shkeljet e vlerësuara në studim nuk janë raportuar në polici, ato nuk janë regjistruar në statistikat zyrtare. Vetëm “anketat e zonës gri” si “Anketa e Krimit 2022” mund t’i nxjerrin në dritë këto vepra në hije, thotë KKPK, shkruan RTS.