Zvicra harton plan kombëtar për rritjen e sigurisë në transportin publik

Dhuna dhe sulmet në trena e mjete të tjera të transportit janë bërë një shqetësim në rritje, ndaj autoritetet po përgatisin masa të reja mbrojtëse.

Zvicra po përgatit një plan kombëtar për ta bërë transportin publik më të sigurt, pas rritjes së rasteve të dhunës dhe sulmeve ndaj udhëtarëve dhe punonjësve të këtij sektori, përcjell albinfo.ch.

Sipas Zyrës Federale të Transportit (FOT), “sulmet dhe dhuna në transportin publik paraqesin një sfidë në rritje për sektorin”. Për këtë arsye, qeveria federale ka nisur hartimin e një plani kombëtar veprimi që synon forcimin e sigurisë në sistemin e transportit.

Plani parashikon një sërë masash, përfshirë koordinimin dhe standardizimin e ndërhyrjeve policore mes kantoneve, si dhe trajnime për punonjësit e transportit për menaxhimin dhe qetësimin e situatave konfliktuoze.

Një tjetër element i rëndësishëm është rishikimi i rregullave për përdorimin e kamerave të trupit nga zyrtarët, autorizimin e policisë së transportit për përdorimin e pajisjeve neutralizuese, si dhe zgjerimin e mbikëqyrjes video në kohë reale në mjetet e transportit publik.

Autoritetet zvicerane synojnë që përmes këtyre masave të rrisin sigurinë e pasagjerëve dhe të krijojnë kushte më të mira pune për personelin që shërben në transportin publik. /Albinfo.ch

---