Shtetasi kosovar arrestohet në Serbi, kishte me vete kartën e babait veteran i UÇK-së

Foto ilustrim

Një shtetas i Kosovës në kufirin Kroaci-Serbi është arrestuar gjatë të dielës rreth orës 11:40, ka njoftuar avokati Xhevdet Smakiqi, teksa sipas tij, bëhet fjalë për Kushtrim Bytyqin nga Fushë-Kosova, i cili u arrestua derisa po kthehej në Kosovë nga Gjermania, përcjell albinfo.ch.

Sipas famlijarëve të Kushtrim Bytyqit, ai ishte arrestuar pasi i kishin gjetur kartën e veteranit të babait të tij si pjesëtar i Ushtrisë Çlirimtare të Kosovës dhe po ashtu i janë sekuestruar sende personale dhe të hollat në kuletën e tij.

“Familja Bytyqi është në ankth, pasi që përveç njoftimit në momentin e ndalimit, nuk ka asnjë kontakt se ku po mbahet djali i tyre, Kushtrim Bytyqi”, ka njoftuar Smakiqi.

Tutje ai u shpreh se Serbia duhet ta ndalojë torturimin e qytetarëve nga Kosova.

“Në emër dhe si avokat i familjes Bytyqi përmes këtij postimi kërkoi nga Ministria e Jashtme e Kosovës që përmes rrugëve diplomatike të ndërmarrë të gjitha veprimet për të kuptuar se ku po mbahet shtetasi i Kosovës, Kushtrim Bytyqi, dhe që ai të lirohet sa më shpejt”, theksoi ai.