SWISS dhe Lufthansa do të rifillojnë fluturimet për në Tel Aviv në janar

(KEYSTONE/Christian Beutler)

Grupi gjerman i linjës ajrore Lufthansa dhe Swiss International Air Lines (SWISS) planifikojnë të rifillojnë fluturimet për në Tel Aviv nga 8 janari, pasi shërbimi u pezullua pas sulmeve terroriste të Hamasit të 7 tetorit.

“Linjat ajrore të grupit do të ofrojnë gjithsej 20 shërbime javore për dhe nga Tel Aviv”, tha Lufthansa, e cila zotëron SWISS dhe Austrian Airlines teksa u tha se këto fluturime do të operohen nëpërmjet qendrave të saj në Frankfurt, Mynih, Vjenë dhe Cyrih, shkruan swissinfo.

Në një deklaratë të veçantë për shtyp, SWISS tha se do të ofronte pesë fluturime javore midis Aeroportit të Cyrihut dhe Tel Avivit, të cilat mund të rezervohen nga 18 dhjetori, përcjell albinfo.ch.

“Pas një analize të hollësishme të situatës, SWISS ka arritur në përfundimin se një shërbim ajror i sigurt mund të garantohet,” thuhet në njoftim.

Ndër të tjera, në njoftim u tha se siguria është përparësia absolute ndërsa po monitorohet nga afër situata e sigurisë në Izrael.