Gjykata vendos sot për Sali Berishën

Dhënia e vendimit u shty për shkak të kërkesës për përjashtimin e gjyqtares Irena Gjoka, përcjell albinfo.ch.

Për të dytën herë radhazi, Gjykata e Posaçme ka shtyrë dje marrjen e masës së sigurisë ndaj Sali Berishës, pas kërkesës së SPAK për ta ashpërsuar atë, deri në arrest shtëpie.

Shkak është bërë kërkesa e avokatëve të Sali Berishës për të përjashtuar gjyqtaren Irena Gjoka. Avokati i ish-kryeministrit sqaron se përse po e përsërisin kërkesën pas dy herëve që është rrëzuar.

“Kjo gjykatë për herë të parë ka hapur një precedentë që vazhdon gjykimi me kërkesë përjashtimi të pagjykuar. Aq absurde është kjo saqë me logjikën e gjykatës ne duhet ta shterojmë, ta mbarojmë gjykimin dhe në fund nëse kjo gjykatëse përjashtohet ne do të fillojmë nga e para me gjyqtarin tjetër.”

Por a është kjo një tentativë për të zvarritur procesin?

“Ne nuk po zvarisim procesin, ne po bëjmë ato kërkesa të cilat ne na japin të drejtën që t’i rikërkojmë në gjykatat e mëpastajme.”

SPAK ka kërkuar ashpërsim të masës së sigurisë ndaj Berishës, nga “detyrim paraqitje” në “arrest shtëpie”, të ruhet me roje sigurie te dera dhe të mos lejohet të komunikojë me persona të tjerë jashtë banesës së tij.

Vendimi për ashpërsimin ose jo të masës së sigurisë ndaj ish-kryeministrit pritet të jepet ditën e sotme në orën 15:00.