Stuhia “Isha” shkaktoi qindra anulime të aeroplanëve në Evropë

Mësohet se mijëra pasagjerë të linjave ajrore përgjatë Evropës janë zgjuar të martën në destinacione e shtete të gabuara, pasi stuhia “Isha” ka bërë kërdinë me aeroplanë, me dhjetëra e qindra anulime, devijime a rrotullime në Evropën Perëndimore, përcjell albinfo.ch.

Thuhet se ata që udhëtuan drejt Irlandës dhe Mbretërisë së Bashkuar natën e shkuar, fluturimi ishte një aventurë e gjatë. Aeroportet u goditën fort nga stuhia, që solli erëra deri në 150 kilometra për orë.

Vlen të theksohet se shumë aeroplanë të nisur drejt zonave perëndimore u devijuan në Evropën kontinentale më të sigurt. “Ryanair” u prek dukshëm, pasi baza e saj në Dublin u detyrua të anulonte fluturimet të dielën.

Pos anulimeve, pati edhe 36 devijime e 34 rrotullime (dështim të aterrimit dhe ritentim). Numrat tregojnë skena të papara deri tash.

Një fluturim nga Lanzarote në ishujt Kanarine, drejt Dublinit, ia doli fare afër kryeqytetit irlandez, para se të kthehej e të riorientohej drejt Bordeauxit në Francë.

Një tjetër fluturim ishte paraparë nga Manchesteri drejt Dublinit, por u detyrua të kthehej drejt Parisit. Një fluturim i zakonshëm prej gjysmë ore u bë dy orë e gjysmë.

Një tjetër fluturim Manchester-Dublin zgjati tri orë, duke ndryshuar disa lokacione para se të aterronte në Liverpool, veç 50 kilometra larg aeroportit nisës.

Një fluturim tjetër, i paraparë të zgjasë një orë, nga Shannoni në Irlandë drejt Edinburgut në Skoci, u devijua drejt Koelnit në Gjermani.