Rriten rastet e fruthit në Evropë, alarmon OBSH

Organizata Botërore e Shëndetësisë (OBSH) ngre alarmin për rastet e shtuara me fruth në Evropë.

Nëpërmjet një komunikimi zyrtar, OBSH njofton për një rritje alarmante me 30-fish të rasteve të fruthit në Evropë gjatë 2023-ës.Teksa bën thirrje për vaksinim, OBSH thotë se rastet me fruth janë rritur me tridhjetë herë në periudhën janar-tetor të vitit 2023 në krahasim me vitin 2022.

Më shumë se 30,000 njerëz u infektuan në 2023, krahasuar me 941 gjatë gjithë vitit 2022, shkruan BBC, përcjell albinfo.ch.

Drejtuesit e shëndetësisë paralajmërojnë se rastet janë ende në rritje dhe nevojiten “masa urgjente” për të parandaluar përhapjen e mëtejshme.

OBSH-ja mendon se kjo është rezultat i numrit më të paktë të fëmijëve që janë vaksinuar kundër sëmundjes gjatë pandemisë së COVID.

Duke folur për situatën në Evropë, Dr. Hans Kluge, drejtor rajonal në OBSH, u shpreh se situatë është shumë shqetësuese.

“Ne kemi parë, në rajon, jo vetëm një rritje 30-fish të rasteve të fruthit, por edhe afro 21,000 shtrime në spital dhe pesë vdekje të lidhura me fruthin. Kjo është shqetësuese.Vaksinimi është mënyra e vetme për të mbrojtur fëmijët nga kjo sëmundje potencialisht e rrezikshme”, tha ai.