Kryqi i Kuq raporton 23,000 të zhdukur në luftën në Ukrainë

(AP Photo/Felipe Dana)

Komiteti Ndërkombëtar i Kryqit të Kuq (KNKK) po kërkon të sqarojë fatin e 23,000 personave të zhdukur në lidhje me luftën në Ukrainë.

Deri në fund të janarit organizata kishte ndihmuar rreth 8,000 familje të merrnin informacion mbi fatin ose vendndodhjen e të dashurve të tyre, shkruan swissinfo.

Gjatë dy viteve të fundit KNKK ka marrë më shumë se 115,000 kërkesa për gjurmim nga familjet në Ukrainë dhe Rusi, tha organizata me bazë në Gjenevë në një deklaratë sot, transmeton albinfo.ch.

Kërkimet menaxhohen nga Byroja Qendrore e Agjencisë së Gjurmimit të KNKK-së (CTA-B) për konfliktin e armatosur ndërkombëtar midis Federatës Ruse dhe Ukrainës, i cili u hap në mars 2022.

KNKK përsëriti se e drejta e familjeve për të ditur fatin e të afërmve të tyre të zhdukur është e sanksionuar në të drejtën ndërkombëtare humanitare. Në çdo konflikt të armatosur ndërkombëtar, palët kanë detyrimin të parandalojnë zhdukjen e njerëzve dhe të sigurojnë që familjet që kërkojnë të dashurit e tyre të informohen për atë që u ka ndodhur.