Viktimat e dhunës në martesë nuk do ta humbin statusin e qëndrimit në Zvicër

Pas Dhomës Nacionale edhe Dhoma e Kantoneve, e Parlamentit të Zvicrës, ka miratuar sot gjithashtu një ndryshim përkatës në ligj

Parlamenti ka vendosur që të mbrohen më mirë viktimat, shtetas/e të huaj/a të dhunës në familje, transmeton albinfo.ch. Kushdo që largohet nga një marrëdhënie e dhunshme martesore ose e bashkëjetesës do të konsiderohet në të ardhmen “rast i rëndë” dhe nuk duhet të humbasë më statusin e tij të qëndrimit, që e kishte, në Zvicër.

Pas Dhomës Nacionale edhe Dhoma e Kantoneve, e Parlamentit të Zvicrës, ka miratuar sot gjithashtu një ndryshim përkatës në ligj, shkruan srf.ch. Ky ndryshim e bën më të lehtë për viktimat e huaja të dhunës në familje marrjen e qëndrimit të përhershëm në Zvicër dhe mbajtjen e statusit që e kishin fituar tashmë.

Sipas situatës aktuale ligjore, viktimat e huaja të dhunës mund të humbasin lejen e qëndrimit në Zvicër nëse, për shembull, divorcohen nga dhunuesi me të cilin pra jetonin të kurorëzuar. Për shkak të dallimeve të vogla, propozimi i kthehet sërish Dhomës Nacionale të Parlamentit Federal të Zvicrës.

---