Diaspora, e painteresuar për të votuar në Maqedoninë Veriore

Nga KSHZ-ja informojnë edhe se regjistrimi i votuesve në diasporë ka përfunduar sot në orën 9

Ka përfunduar kontrollimi i Listës Zgjedhore dhe regjistrimi i votuesve nga diaspora për zgjedhjet e ardhshme Presidenciale dhe Zgjedhjet Parlamentare në Maqedoninë Veriore.

KSHZ-ja ka njoftuar se deri dje, në departamentet rajonale dhe zyrat e Komisionit Shtetëror të Zgjedhjeve të dhënat e tyre në Listën Zgjedhore i kanë kontrolluar 6.231 persona, shkruajnë mediat shqiptare në Shkup, përcjell albinfo.ch.

Kontroll elektronik të të dhënave kanë bërë gjithsej 56.299 qytetarë, ndërsa janë parashtruar 47 kërkesa për ndryshimin e të dhënave.

Lidhur me kërkesat e pranuara për regjistrimin e votuesve në diasporë, sipas informacioneve nga KSHZ-ja, deri më sot në orën 09.00 janë pranuar gjithsej 2.943 aplikime, nga të cilat 2.369 janë pranuar, 396 janë refuzuar dhe 178 aplikime të papërpunuara që do të shqyrtohen gjatë ditës së sotme.

Nga KSHZ-ja informojnë edhe se regjistrimi i votuesve në diasporë ka përfunduar sot në orën 9, për shkak të problemeve teknike me ueb-faqen për regjistrimin e diasporës.

---