Cana: Zbulova problemin me zemrën, por doja të luaja në Euro 2016

Ai tha se në 2015-ën kur ishte lojtar i Lazios, ishte diagnostikuar me sëmundje të muskujve të zemrës

Ish-kapiteni i Kombëtares shqiptare të futbollit, Lorik Cana, në një intervistë të dhënë për “Oh my Goal”, ka folur për gjëra të ndryshme të rrugëtimit të tij si futbollist.

Cana ka zbuluar edhe gjëra, të cilat kurrë më parë nuk i kishte bërë me dije si atë të problemeve shëndetësore në vitin 2015.

Ai tha se në 2015-ën kur ishte lojtar i Lazios, ishte diagnostikuar me sëmundje të muskujve të zemrës, transmeton albinfo.ch.

“Në vitin 2015 u diagnostikova me një sëmundje të muskujve të zemrës. Kisha mbetur një vit nga kontrata ime me Lazion, isha 32 vjeç. Kisha ardhur nga një sezon i mrekullueshëm në Romë: kishim përfunduar të tretët në ligë dhe në kampionat. Finalja e Coppa Italia. Kisha kaluar një pjesë të mirë të sezonit me De Vrij në qendër të mbrojtjes dhe në fund u zbulua ky problem. U gjenda në një situatë krejtësisht të re që nuk e njihja më parë”, tha Cana.

Ish-kapiteni zbuloi se nuk kishte dashur të tërhiqej nga futbolli pasi donte të arrinte edhe kualifikimin e ekipit kombëtar në Euro 2016, gjë që e realizoi.

“Nuk doja të ndalesha, sepse kishte ende një gjë që doja të arrija në karrierën time: kualifikimin e ekipit tim kombëtar për një turne të rëndësishëm, diçka që nuk ishte parë kurrë më parë. U afruam shumë sepse na kishin mbetur edhe katër ndeshje, ato të shtatorit dhe tetorit. Nëse do të isha gjetur në të njëjtën situatë një vit më vonë, në vitin 2016, do ta kisha mbyllur menjëherë karrierën, sepse kardiologët nuk donin të vazhdoja dhe më këshilluan menjëherë të ndaloja”, tha ai.

 

---