Rrëzohet helikopteri me drogë, vdes piloti shqiptar

Ploti shqiptar ishte majori Sokol Feka, i cili sipas Ministrisë shqiptare të Mbrojtjes, kishte marrë pushim nga periudha 12-31 janar. Në fluturake kishte një tonë drogë

Një pilot shqiptar i Forcave të Armatosura të Shqipërisë (FASH) ka humbur jetën në rajonin e Malagës në Spanjë, pas helikopteri me një ton drogë, u përplasë në një shtyllë betoni. Bashkë me pilotin shqiptar ka humbur jetën edhe një pilot tjetër spanjoll, të cilët po sillnin drogë nga Maroko në Spanjë.

Helikopteri u rrëzua në Cortes de la Frontera të Malagës. Ploti shqiptar ishte majori Sokol Feka, i cili sipas ministrisë shqiptare të Mbrojtjes, kishte marrë pushim nga periudha 12-31 janar, por nuk i kishte njoftuar autoritetet shqiptare se po udhëtonte jahte vendit.

Kryeministri Edi Rama duke folur në Kuvendin e Shqipërisë tha se kanë marrë lajme për një ngjarje të rëndë që ka ndodhur në Spanjë, ku sipas tij, është rrëzuar një helikopter që transportonte drogë, i cili drejtohej nga një major shqiptar i Forcave të Armatosura Shqiptare.

“Ky major është në strukturat e Forcave të Armatosura Shqiptare prej 18 vjetësh, gradën major e ka marrë në vitin 2009 dhe është një nga pilotët më të besuar të Forcave tona të Armatosura. Tani nuk ja vlen të hyjmë në diskutimin. Është piloti jonë apo juaji”, tha Rama.

Ndërkohë, mediat spanjolle e kanë raportuar së fundmi këtë ngjarje, duke saktësuar se në bordin e helikopterit ndodheshin dy persona, njëri spanjoll dhe tjetri i huaj, të cilët transportonin rreth 1 ton hashash.

Autoritetet spanjolle kanë gjetur në helikopter rreth 30 pako hashash, por ende nuk është saktësuar sasia në kilogramë pasi hetimi po vazhdon.

Ministrja e Mbrojtjes Mimi Kodheli tha se major Sokol Feka kishte leje të zakonshme nga Forcat e Armatosura, por jo për të dal ashtë vendit.

“Majori ka dalë nga Shqipëria pa leje. Gjithë shqiptarët që janë larguar nga Forcat e Armatosura janë larguar sepse kanë dalë pa leje nga RSH. Gjithçka pas kësaj është një histori nën investigimin spanjoll, e vërteta do dalë”, u shpreh Kodheli.