Italia tërhiqet nga kërkesa për ekstradimin e shqiptarit të arrestuar në Shqipëri

Foto Ilustrim @pixabay

Italia është tërhequr nga kërkesa për ekstradimin e Dritan Xhepexhiut, i arrestuar në Shqipëri si anëtar i një grupi që kishte trafikuar drogë midis viteve 2019 dhe 2020.

I njohur edhe si Dritan Idrizi, 38-vjeçari u arrestua nga forcat operacionale në fillim të vitit, teksa gjatë kohës që shqiptari mbahej në paraburgim në vendin e tij, një gjykatë italiane ka zbutur masën e sigurisë në Itali  për akuzën e trafikut të paligjshëm të lëndëve narkotike kryer në bashkëpunim. Në pritje për ta ekstraduar drejt Italisë, situata e të riut nga Gramshi ndryshoi menjëherë, shkruan TCH, transmeton albinfo.ch.

Për këtë arsye prokurori i çështjes u tërhoq nga kërkesa për ekstradim dhe rrjedhimisht nga kërkesa për arrest me burg, duke këmbëngulur për revokim të kësaj mase.

Xhepexhiu u lirua nga gjykata e Tiranës, bazuar në tërheqjen e italianëve që më herët kishin përcjellë materiale hetimore, ku shfaqeshin edhe emra të tjerë të shpërndarjes së kokainës, midis tyre të Rabab Mufakir dhe Erich Domeneg, ky i fundit i ngarkuar për të dorëzuar paratë e drogës në një qendër tregtare.