61 kosovarë pa letra kapen në trenin Hungari-Gjermani

Gjatë janarit në pikat kufitare Austri-Gjermani, rreth Rosenheim-it, kanë hyrë 330 kosovarë, e në dhjetor, 420 sish

Të shtunën, më 7 shkurt, policia gjermane ka zënë 61 kosovarë në një tren. Ata kishin hyrë në këtë shtet pa dokumentaionin e nevojshëm dhe  po udhëtonin nga Hungaria me një tren të relacioneve të gjata. Për shkak se u mungonin dokumentet valide të udhëtimit dhe vizat për qëndrim në Gjermani, ata janë zbritur nga treni në Rosenheim.

Në mesin e tyre ishin 49 të rritur dhe 12 fëimijë ose të mitur. Shumica, gjatë marrjes në pyetje janë deklaruar se kërkojnë azil. Fillimisht ata janë dërguar në Qendrën e Pranimit të Refugjatëve në Munih. Por një pjesë e tyre janë detyruar ta lëshojnë Gjermaninë menjëherë.

Policia i ka marrë ata në pyetje dhe i ka sjellë në qendrën e shërbimit të Policisë Federale. Inspekcioni në Rosenheim i Policisë Federale konfirmon se numri i kosovarëve që hyjnë në Gjermani pa letra është shumë i madh prej disa muajsh.

Po ashtu gjatë vikendit Policia Federale e Rosenheimit ka kapur 150 persona që kanë hyrë pa Dokumente në Gjermani. Rreth 90 prej tyre ishin kosovarë.

Ndërsa nga 980 personat e hyrë pa letra gjatë janarit në pikat kufitare Austri-Gjermani, rreth Rosenheim-it, 330 kanë qenë kosovarë. Gjatë dhjetorit të vitit të kaluar ky numër ka qenë edhe më i madh: rreth 420 gra dhe burra kosovarë janë regjistruar si migrantë ilegalë vetëm në këtë regjion.