Dhjetë persona janë evakuuar pas zjarrit në qendër të Freiburgut

Dhjetë persona u evakuuan natën e së hënës për shkak të një zjarri në qendër të qytetit të Freiburgut. Dy persona u dërguan në spital për kontroll.

Sipas policisë kantonale, zjarri ka rënë pak pas mesnate në një ndërtesë komerciale dhe rezidenciale në Rue de Romont. Forcat zjarrfikëse kanë vënë flakët nën kontroll. Burimi i zjarrit ndodhej në një ambient komercial, në katin e dytë të pallatit.

Dy ambiente biznesi dhe një apartament nuk mund të shfrytëzohen për momentin. Shkaku i zjarrit është objekt i hetimeve të vazhdueshme. Policia kantonale nuk ka dhënë asnjë informacion për shkallën e dëmit material./Blick