Lisa Vulai, malësorja që synon Parlamentin austriak

“Dua t’i përfaqësoj interesant e të gjithë bashkatdhetarëve të mi dhe t’i realizoj ato sa më mirë në mënyrë parlamentare”

 

Lisa Vulai është lindur në Tuz të Malit të Zi, ndërsa është rritur dhe jeton në Tirol të Austrisë.

Profesioni i saj është përkthyese për gjuhën shqipe dhe gjuhët sllave, për gjykatat dhe për policinë austriake.

Angazhimi i Lisës në politikë qëndron në përmirësimin e kushteve më të mira për të gjithë qytetarët në Austri, e veçanërisht për të qenë një zë i fuqishëm i shqiptarëve në Parlamentin e Austrisë. Ndonëse prej vitesh është anëtare e Partisë Popullore të Austrisë (ÖVP), kjo është hera e parë që ajo garon për një ulëse në këtë parlament.

Albinfo.at: Jemi në prag të zgjedhjeve parlamentare në Austri. Ju jeni kandidate nga partia e ÖVP-së. Pse vendoset t’i hyni kësaj gare dhe çfarë do të thotë kjo për ju?

Lisa Vulai: Për disa vjet isha anëtare e partisë së ÖVP-së dhe përkatësisë së besëlidhjes në ÖAAB të Tirolit dhe gjithashtu isha delegate e partisë së qytetit të Innsbruck-ut.

Unë e shikoj këtë si një mundësi për të përfaqësuar interesat e të gjithë bashkatdhetarëve të mi dhe austriakëve në nivel parlamentar.

Albinfo.at: Kanë mbetur edhe disa ditë deri në ditën e zgjedhjeve. Si po shkon fushata, sa është gara e vështirë?

Lisa Vulai: Çdo gjë e re nuk është e lehtë. As jeta nuk është gjithmonë e lehtë, por mund të arrish shumë nëse me të vërtetë e dëshiron.

 

 

Albinfo.at: Ku është fokusi juaj më shumë. Votat e kujt i kërkoni gjatë këtyre zgjedhjeve për një karrige për ju në Parlament?

Lisa Vulai: Unë i ftoj të gjithë bashkatdhetarët, të gjithë austriakët që jetojnë në Tirol, të japin votën preferenciale kandidatit tim kryesor, Jakob Grüner, në nivelin e landit dhe të gjithë qytetarëve që banojnë në Innsbruck – Stadt të më votojnë mua.

Ju lutem, më 29 shtator shënoni një x në listën zgjedhore të Këshillit Nacional Parlamentar në Innsbruck-Stadt, me numrin 11 dhe shkruani Vulai Lisa.

Albinfo.at: Përse e doni këtë karrige? A ka një mision ose qëllim që ju doni të jeni pjesë e Parlamentit austriak?

 Lisa Vulai: Për arsye se për mua është një sfidë e re dhe dua të angazhohem 100 për qind për çështjet e bashkëqytetarëve të mi. Misioni im është të ndikoj që çështjet të merren seriozisht dhe të realizohen.

Albinfo.at: Sa vota ju duhen që të zini vend në Parlamentin Federal të Austrisë?

Lisa Vulai: Më duhen të paktën 14% të votave të përgjithshme në zonën time zgjedhore në Innsbruck-Stadt që të kem shans të renditem si një fillestare politike.

Albinfo.at: Cilat janë tri temat me prioritet me të cilat garoni në këto zgjedhje?

Lisa Vulai:  Të përfaqësoj interesant e të gjithë bashkatdhetarëve të mi dhe t’i realizoj ato sa më mirë në mënyrë parlamentare.

Të ndërmarr masa për të bërë të dukshme diskriminimin dhe racizmin e përditshëm.

Të lehtësoj dhe të zhvilloj më tej qasjen në profesionet e kujdesit shëndetësor.

 Albinfo.at: Sa keni mbështetjen e komunitetit shqiptar në Austri dhe pse mendoni se duhet t’ju votojnë?

Lisa Vulai: I vlerësoj shumë mirë shanset e mia falë besnikërisë sime ndaj bashkatdhetarëve të mi dhe qytetarëve të Innsbruck-ut. Andaj, unë shpresoj se bashkatdhetarët tanë do të dalin më 29 shtator dhe do të votojnë në listën e ÖVP-së, numrin 11 dhe do të shënojnë emrin tim, Vulai Lisa.

 

---