SEM zvogëlon numrin e stafit mbikëqyrës për aplikantët e mitur

Sekretariati Shtetëror për Migracionin (SEM) po redukton numrin e stafit të kujdesit për azilkërkuesit e mitur të pashoqëruar (UMA).

Në nivel kombëtar, thuhet se do të shkurtohen 120 pozicione me kohë të plotë, teksa është duke u konsideruar edhe mbyllja e disa lokacioneve, transmeton albinfo.ch.

SEM përmend rënien e numrit të azilkërkuesve të rinj që mbërrijnë në Zvicër si arsye për masën.

“Meqenëse po kujdesemi për më pak azilkërkues sesa pritej, do të kemi nevojë për më pak staf kujdesi në muajt e ardhshëm dhe po shqyrtojmë mbylljen e disa lokacioneve”, tha zëdhënësja e SEM, Magdalena Rast, për agjencinë e lajmeve Keystone-SDA.

Numri i të rinjve të pashoqëruar në qendrat e ndryshme federale të azilit ka rënë nga 1500 në shtator 2023, në 600 sot. Vendimi nuk prek edukatorët socialë të trajnuar posaçërisht.

Qendra e Les Rochats do të mbyllet

SEM aktualisht është duke punuar në masa specifike dhe do të japë informacion në kohën e duhur. Sipas gazetës, 20 nga rreth 140 punonjës në Qendrën Federale të Azilit (BAZ) në Boudry NE janë prekur dhe 25 nga rreth 65 vende pune në Les Rochats VD do të zhduken.

Zëdhënësja konfirmoi gjithashtu mbylljen e afërt të qendrës në Les Rochats. Ajo do të qëndrojë në funksion derisa të hapet qendra në Grand-Saconnex GE, e cila është planifikuar për verën e vitit 2025. Qendra në Les Rochats është akomodim që i vihet përkohësisht në dispozicion SEM nga Departamenti Federal i Mbrojtjes. SEM do të ketë akomodim të mjaftueshëm deri në mesin e vitit 2025, shtoi Rast.