Tetë të arrestuar pas sulmit të së premtes në veri

Ministri i Punëve të Brendshme në Kosovë, Xhelal Sveçla, ka njoftuar se pas aktit terrorist të së premtes, kur me eksploziv u dëmtua kanali i Ibër – Lepencit, policia ka arrestuar tetë persona të dyshuar në veri të vendit.

Në një konferencë për media, ai ka deklaruar se sulmi i fundit ndaj infrastrukturës jetike është më i rëndi në Kosovë që nga paslufta, transmeton albinfo.ch.

SIpas tij, institucionet tashmë kanë bashkërenduar aktivitetet për të zbardhur ngjarjen.

“Pas hetimeve intensive sot në orët e mëngjesit janë organizuar kontrolle dhe janë arrestuar 8 persona të dyshuar për përfshirje në këto raste. Në këto aksione janë konfiskuar armë, eksplozivë, uniforma e gjëra të tjera që do t’i shërbejnë hetimit”, ka deklaruar ai.