New Mexico: Tre të vdekur dhe 14 të plagosur, pas sulmeve me armë zjarri

Tre persona kanë vdekur dhe 14 të tjerë janë plagosur si pasojë e të shtënave masive me armë zjarri në Las Cruces, New Mexico.

Sipas njoftimit nga policia, të shtënat ndodhën mbrëmë rreth orës 22:00 në Young Park, ndërsa ndër të vrarët ishin dy 19-vjeçarë dhe një djalë 16-vjeçar, transmeton albinfo.ch.

Autoritetet kanë bërë të ditur se nuk janë identifikuar ende të gjithë të plagosurit, por thanë se të plagosurit ishin të moshës 16-36 vjeç, raporton The Guardian.

Deri më tani, asnjë arrestim nuk është bërë, por policia po ndjek shumë pista, thanë zyrtarët.

“Oficerët arritën dhe mësuan për viktima të shumta me armë zjarri. Shumica u transportuan në spitalet lokale. Disa u dërguan në Qendrën Mjekësore Universitare të El Pasos,” tha policia.