Gjatë përpjekjes për vjedhje, 16 vjeçari bllokohet në derën e dyqanit dhe vdes

Sipas gjetjeve fillestare të hetimit, viktima ka tentuar të hyjë për të vjedhur në një dyqan sanduiçësh në Vevey, Vaud

Një 16-vjeçar u bllokua në një derë dyqani gjatë një tentative për të plaçkitur një dyqan në Vevey (VD), natën mes së premtes dhe së shtunës. Ai vdiq në vendngjarje.

Policia e kantonit të Vaudit e gjeti djalin pa jetë rreth orës 04:00 të mëngjesit, transmeton albinfo.ch. Ajo konfirmoi një raportim nga disa media. Trupi i tij ishte bllokuar në nivelin e qafës, midis paneleve të një dere rrëshqitëse të një dyqani pranë stacionit të trenit.

Pavarësisht përpjekjeve për ta ringjallur, adoleshenti ndërroi jetë në vend. Sipas të dhënave fillestare të hetimit, viktima kishte tentuar të hynte për të vjedhur në një dyqan sanduiçesh, njoftoi policia të dielën në mëngjes për agjencinë e lajmeve Keystone-SDA.

Ai kishte arritur të hapte derën rrëshqitëse elektrike të mbyllur dhe të shtynte pjesën e sipërme të trupit, para se dera të mbyllej në zonën e qafës së tij, përcjell albinfo.ch. Policia dyshon qartazi se bëhet fjalë për një aksident. Hetimet janë në vijim për të përcaktuar rrjedhën e saktë të ngjarjes.

---