Anulohen konkurset në Graçanicë pas protestave kundër ‘punësimit të personave të afërt’ me Listën Serbe

Foto: Lista Serbe, FB

Konkurset për pranimin e punonjësve në institucionet shëndetësore në territorin e komunës së Graçanicës janë anuluar më 5 prill, pas disa ditësh protesta nga banorët lokalë të pakënaqur, të cilët akuzuan se punësimet po bëheshin në mënyrë të padrejtë, përmes ndikimit politik nga Lista Serbe.

Banorët kanë protestuar përpara Qendrave të Mjekësisë Familjare në Graçanicë, Uglar dhe Gushtericë të Poshtme, duke pohuar se punësimet janë bërë për persona të afërt me subjektin politik Lista Serbe – partia kryesore e serbëve në Kosovë, e mbështetur nga Beogradi zyrtar. Sipas tyre, disa nga të punësuarit nuk jetojnë fare në Kosovë, transmeton albinfo.ch.

Megjithatë, në vendimin zyrtar të publikuar në faqen e Qendrës së Mjekësisë Familjare në Graçanicë, thuhet se konkurset janë anuluar “për shkak të skadimit të afatit prej 30 ditësh për marrjen e vendimit për përzgjedhjen e kandidatëve”.

Konkurset ishin shpallur nga Ministria e Shëndetësisë e Serbisë në fund të janarit, për institucionet që funksionojnë në përputhje me sistemin serb të shëndetësisë në zonat me shumicë serbe në Kosovë. Ato përkuan me fushatën për zgjedhjet parlamentare të Kosovës më 9 shkurt, ku Lista Serbe ishte pjesë e garës, shkruan REL.

Kryetari i kësaj partie, Zllatan Elek – njëherësh edhe drejtor i Qendrës Klinike Spitalore në Mitrovicën e Veriut – kishte deklaruar gjatë fushatës se shteti i Serbisë ka siguruar shumë vende pune për serbët në Kosovë, duke e përshkruar këtë si një mënyrë për të “mbijetuar”.

Një nga protestuesit, Petar Gjorgjeviq nga Graçanica, ka pohuar se mbi protestuesit është ushtruar presion, dhe i ka bërë thirrje qytetarëve të dokumentojnë çdo kërcënim apo shkelje.

Lista Serbe dhe Ministria e Shëndetësisë e Serbisë nuk kanë dhënë asnjë koment mbi këto akuza, përkundër kërkesave për përgjigje nga Radio Evropa e Lirë, transmeton albinfo.ch.