Vdes Papa Françesku

Këtë të hënë është njoftuar se ka vdekur Papa Françesku. Eminenca e Tij, Kardinali Kevin Farrell, bëri me dije ndarjen nga jeta të Atit të Shenjtë, Papa Françeskut.

“Vëllezër dhe motra të dashur, me pikëllim të thellë duhet të njoftoj vdekjen e Atit tonë të Shenjtë, Françeskut,” tha Kardinali Farrell në deklaratën e tij zyrtare, transmeton albinfo.ch.

Sipas njoftimit, Papa Françesku ndërroi jetë sot në mëngjes, në orën 07:35 me orën lokale. “Ipeshkvi i Romës, Françesku, u kthye në shtëpinë e Atit. E gjithë jeta e tij ishte një përkushtim ndaj shërbimit të Zotit dhe Kishës së Tij,” theksoi Kardinali.

Ai vlerësoi thellësisht jetën dhe veprën e Papës, duke shtuar: “Ai na mësoi të jetojmë vlerat e Ungjillit me besnikëri, guxim dhe dashuri universale, veçanërisht në favor të më të varfërve dhe më të margjinalizuarve.”

“Me mirënjohje të madhe për shembullin e tij si një dishepull i vërtetë i Zotit Jezus, ia besojmë shpirtin e Papës Françesku dashurisë së pafund dhe mëshirës së Hyjit Një dhe Trini.”

Ceremonitë mortore priten të mbahen në ditët në vijim në Vatikan, transmeton albinfo.ch.