Vendi që ndalon prodhimin e kriptomonedhave pêr shkak të krizës energjetike

Kuvajti ka marrë një hap të prerë kundër gërmimit të kriptomonedhave, duke e shpallur atë të jashtëligjshëm dhe të rrezikshëm për sigurinë publike. Vendimi vjen si përgjigje ndaj krizës në rrjetin elektrik të vendit, i cili po përballet me mbingarkesë për shkak të temperaturave ekstreme dhe kërkesës së lartë për energji gjatë muajve të verës.

Ministria e Brendshme ka nisur një operacion të gjerë sigurie, duke bastisur shtëpi të dyshuara për aktivitet ilegal të minierave digjitale, veçanërisht në zonën e Al-Wafra-s, ku janë identifikuar mbi 100 shtëpi që konsumonin shumëfish më shumë energji se zakonisht. Sipas autoriteteve, konsumi në këtë rajon ra me 55% pas ndërhyrjeve.

Kuvajti, ku çmimi i energjisë është ndër më të ulëtit në botë për shkak të subvencioneve shtetërore, është bërë një destinacion i preferuar për operatorët e minierave. Megjithatë, rritja e popullsisë, zgjerimi urban dhe ndryshimet klimatike kanë ushtruar presion të konsiderueshëm mbi rrjetin energjetik, çka ka nxitur këtë ndërhyrje drastike nga autoritetet.

Edhe pse tregtimi i kriptomonedhave është ndaluar që nga viti 2023, minierat deri tani kanë ekzistuar në një zonë të paqartë ligjore. Tashmë, me ndërhyrjen e Ministrisë së Brendshme dhe të Energjisë, ky aktivitet është shpallur tërësisht i paligjshëm dhe subjekt i ndëshkimeve ligjore.

Kryeministri Sheikh Fahad al-Youssef dhe Ministri i Energjisë Dr. Subaih al-Muhaizim po mbikëqyrin personalisht fushatën. Më shumë se 60 persona janë vënë nën hetim, ndërsa mbi 1,000 lokacione janë shënjestruar për konsum të pazakontë të energjisë.

Ekspertët paralajmërojnë se minierat nuk janë shkaku i vetëm i krizës energjetike, por ndikimi i tyre është disproporcional. Sipas Universitetit të Kembrixhit, në vitin 2022 Kuvajti përfaqësonte vetëm 0.05% të fuqisë globale të minierave të Bitcoin. Megjithatë, edhe kjo pjesë e vogël, thonë analistët, është e mjaftueshme për të rrezikuar një sistem tashmë të brishtë energjetik.