Instagram ofron deri në 20,000 dollarë për krijuesit që sjellin përdorues të rinj

@pixabay

Instagram ka nisur një program pilot në SHBA ku krijuesit e përzgjedhur mund të fitojnë deri në 20,000 dollarë duke sjellë përdorues të rinj në platformë. Qëllimi është të konkurrojnë më fort me aplikacione si TikTok dhe YouTube.

Në këtë program, të quajtur “Referrals”, krijuesit marrin 100 dollarë për çdo përdorues të ri që regjistrohet përmes lidhjes së tyre të personalizuar ose për çdo 1,000 vizita në Instagram që vijnë nga ajo lidhje. Programi nuk është i hapur për të gjithë, por vetëm për krijuesit që ftohen nga Instagrami, përcjell albinfo.ch.

Krijuesit inkurajohen të ndajnë profilin, videot dhe postimet e tyre jashtë Instagramit, në platforma të tjera si TikTok, YouTube, Discord apo Substack.

Ky lloj iniciative është pjesë e përpjekjeve të Instagram për të mbajtur krijuesit e përmbajtjes në platformë, sidomos në kohën kur konkurrentët po ofrojnë shpërblime dhe përfitime të tjera.