Gjermani: Kujdestaria dhe të drejtat e vizitës mund të hiqen për prindërit e dhunshëm

pixabay

Ministrja Federale e Drejtësisë, Stefanie Hubig, ka shpallur një iniciativë të re ligjore për të forcuar mbrojtjen e fëmijëve dhe viktimave të dhunës në familje, duke synuar kufizimin e mëtejshëm të të drejtave të kujdestarisë dhe të vizitës për prindërit e dhunshëm, shkruan The Local, transmeton albinfo.ch.

“Kushdo që godet partnerin e tij duhet të presë që të mos lejohet më ta shohë fëmijën e tij – ose vetëm në prani të një personi shoqërues”, deklaroi politikania e SPD-së për grupin mediatik Funke. Deri më tani, ligji gjerman parashikon kufizime të kujdestarisë vetëm në rastet kur fëmija është drejtpërdrejt i dhunuar. Hubig dëshiron që kjo të ndryshojë.

Sipas saj, është e domosdoshme që dhuna ndaj njërit prind të trajtohet ligjërisht si kërcënim edhe për fëmijën, duke theksuar: “Në fund të fundit, fëmija vuan kur babai rreh nënën.”

Ministrja ka bërë të ditur se planifikon të prezantojë reforma të reja në ligjin për mbrojtjen nga dhuna, si pjesë e një pakete më të gjerë për forcimin e të drejtave të viktimave të dhunës familjare. Ndryshimet synojnë të ofrojnë mbrojtje më të shpejtë dhe më të qëndrueshme, veçanërisht për gratë dhe fëmijët që përjetojnë dhunë brenda familjes.

Një tjetër aspekt i reformës është ndryshimi i ligjeve të qirasë, për të lejuar viktimat të dalin më lehtë nga kontratat e përbashkëta të banimit. “Kushdo që preket nga dhuna në familje duhet të jetë në gjendje të largohet nga një marrëveshje qiraje pa pasur nevojë për pajtimin e një partneri abuziv”, u shpreh Hubig, transmeton albinfo.ch.