OKB: Përdorimi i drogës në botë arrin 316 milionë persona

(KEYSTONE/Martin Ruetschi)

Numri i njerëzve që përdorin drogë në mbarë botën ka arritur në 316 milionë, sipas një raporti të fundit të Kombeve të Bashkuara. Këto të dhëna i përkasin vitit 2023 dhe tregojnë se përdorimi i drogës është rritur me 28 për qind gjatë dhjetë viteve të fundit, shkruan ORF, transmeton albinfo.ch.

Raporti vjetor i Zyrës së OKB-së për Drogën dhe Krimin (UNODC) tregon se kokaina është droga që po përhapet më shpejt. Prodhimi i saj ilegal ka arritur në një nivel rekord prej 3,708 tonësh, ndërsa numri i përdoruesve është rritur nga 17 milionë në vitin 2013 në 25 milionë në vitin 2023.

Sipas OKB-së, përhapja e kokainës po sjell jo vetëm më shumë vdekje nga droga, por edhe rritje të dhunës mes grupeve kriminale, sidomos në Evropën Perëndimore dhe Qendrore, ku po konfiskohet më shumë kokainë sesa në Amerikën e Veriut.

Ekspertët bëjnë thirrje për masa parandaluese, edukim dhe mbështetje për të rinjtë, për të ndaluar rritjen e përdorimit të drogës në të ardhmen, transmeton albinfo.ch.