Ndërprerja teknike paralizoi trafikun ajror në Itali

Një ndërprerje e rrallë teknike në rrjetin kombëtar të transmetimit ajror të Italisë, të njohur si E-Net, ka shkaktuar kaos të vërtetë në trafikun ajror mbi Italinë e Veriut mbrëmjen e së shtunës, duke ndikuar drejtpërdrejt në rajonet Lombardi, Piemonte dhe Liguri, shkruan Krone, transmeton albinfo.ch.

Rreth orës 21:00, përdoruesit e platformës së monitorimit të fluturimeve FlightRadar24 vunë re një “boshllëk” të dukshëm në trafikun ajror në qiellin mbi këto rajone, ndërsa fluturimet u anuluan, u vonuan ose u devijuan për shkak të pamundësisë për të garantuar sigurinë e koordinimit ajror.

Ndërprerja e rëndë ndodhi për shkak të një defekti në sistemin E-Net, i cili është përgjegjës për transmetimin e të dhënave radarike, kushteve meteorologjike dhe mesazheve të kontrollit midis qendrave të kontrollit ajror të agjencisë shtetërore italiane ENAV dhe aeroporteve kryesore të vendit, transmeton albinfo.ch.

Ndër aeroportet më të prekura ishin Milano Malpensa, Milano Linate, Torino Caselle, Xhenova, Orio al Serio (Bergamo).

Pamundësia për të përpunuar të dhënat e nevojshme për sigurinë e fluturimeve detyroi autoritetet të pezullonin përkohësisht operacionet ajrore në zonë. Si pasojë, mijëra pasagjerë mbetën të bllokuar në terminale, ndërsa të tjerë u përballën me orë të tëra pritjeje dhe paqartësi mbi udhëtimin e tyre.

Situata në aeroportet veriore të Italisë u tensionua për disa orë, ndërsa ekipet teknike punuan pa ndërprerje për të rikthyer funksionimin normal të sistemit. Autoritetet konfirmuan në orët e para të së dielës se defekti ishte zgjidhur me sukses, dhe se trafiku ajror po i rikthehej gradualisht normalitetit.

ENAV ka paralajmëruar se do të kryhet një hetim i detajuar teknik për të përcaktuar shkakun e saktë të ndërprerjes, si dhe për të shmangur përsëritjen e ngjarjeve të ngjashme në të ardhmen, transmeton albinfo.ch.