Shpërthen zjarr i madh në zonën e Plazhit, në Durrës

Flakët kanë përfshirë disa biznese që ndodhen në zonë, ndërsa tymi i dendur është përhapur në një rreze të gjerë

Një zjarr i përmasave të mëdha ka shpërthyer pasditen e sotme në zonën e Plazhit në Durrës, pranë tregut lokal, duke shkaktuar panik te banorët dhe dëme të konsiderueshme materiale, raporton euronews.

Sipas informacioneve paraprake, flakët kanë përfshirë disa biznese që ndodhen në zonë, ndërsa tymi i dendur është përhapur në një rreze të gjerë. Forcat zjarrfikëse ndodhen në vendngjarje dhe po punojnë me intensitet për vënien nën kontroll të zjarrit.

Policia ka nisur evakuimin e banorëve nga pallatet dhe hotelet përreth, për të garantuar sigurinë e qytetarëve, ndërsa deri më tani nuk raportohet për të lënduar.

Shkaqet e zjarrit mbeten ende të paqarta dhe pritet që hetimet të hedhin më shumë dritë mbi rrethanat e ngjarjes.

Autoritetet u bëjnë apel qytetarëve të shmangin zonën për të mos penguar ndërhyrjen e shërbimeve emergjente.

---