“Shuhet” USAID

Ajo që mbetet nga USAID tani do të integrohet në Departamentin e Shtetit të SHBA-së, nën udhëheqjen e sekretarit të Shtetit, Marco Rubio

Pas më shumë se gjashtë dekadash, Agjencia Amerikane për Zhvillim Ndërkombëtar (USAID) pushoi sot zyrtarisht së ekzistuari, pasi administrata Trump e konsideroi atë si jo në shërbim të interesave të Shteteve të Bashkuara.

Kjo vjen në të njëjtën ditë kur një studim ndërkombëtar zbulon se rënia e fondeve amerikane për ndihmën ndërkombëtare mund të çojë në më shumë se 14 milionë vdekje shtesë deri në vitin 2030 midis më të prekshmëve, një e treta e të cilëve janë fëmijë.

Ajo që mbetet nga USAID tani do të integrohet në Departamentin e Shtetit të SHBA-së, nën udhëheqjen e sekretarit të Shtetit, Marco Rubio.

“Më 1 korrik, USAID do të ndërpresë zyrtarisht zbatimin e ndihmës së huaj. Programet e ndihmës së huaj që përputhen me politikat e administratës dhe u shërbejnë interesave të SHBA-së do të administrohen nga Departamenti i Shtetit, ku do të zbatohen me përgjegjshmëri, strategji dhe efektivitet më të madh”, shkroi Marco Rubio në një mesazh të transmetuar nga zyra e tij, shkruan ATSH, transmeton albinfo.ch.

“Përveç krijimit, me shpenzimet e taksapaguesve, të një kompleksi industrial global të OJQ-ve, USAID ka pak për të treguar për veten që nga fundi i Luftës së Ftohtë”, shtoi ai.

Në një mesazh lamtumire për stafin, të hënën, ish-presidentët George W. Bush dhe Barack Obama, si dhe këngëtari Bono, vlerësuan punën e USAID.

Eliminimi i USAID është “i pashpjegueshëm” dhe “do të mbetet një gabim kolosal”, deklaroi Barack Obama në një video të parë, ndërsa Bush mbrojti programin Pepfar AIDS që ai kishte krijuar.

Që kur u rikthye në pushtet në janar, Donald Trump ka filluar çmontimin e institucionit, duke shkurtuar masivisht ndihmën ndërkombëtare dhe duke eliminuar 83 për qind të financimit për programet jashtë vendit nga agjencia amerikane e zhvillimit, e akuzuar për shpërdorim dhe për përhapjen e vlerave në kundërshtim me interesat e SHBA-së.

Presidenti amerikan nënshkroi një urdhër ekzekutiv më 20 janar, në ditën e tij të parë në detyrë, duke urdhëruar një ngrirje 90-ditore të ndihmës së jashtme të SHBA-së, për të lejuar një rishikim të plotë që do të vlerësonte përputhshmërinë e saj me politikat e tij të synuara, veçanërisht ato që lidhen me programet që promovojnë abortin, planifikimin familjar ose promovojnë diversitetin dhe përfshirjen.

Rezultati nuk vonoi shumë dhe USAID, që kishte një staf prej mbi 10 mijë vetash, që atëherë ka parë numrin e tij të tkurret.

---