Vërshimet në Itali: Evakuohen familjet nga zonat e rrezikuara, shtyhen 13 fluturime

Foto ilustrim

Nga mëngjesi i sotëm, në rajonin e Lombardisë në Itali, reshje të dendura shiu dhe stuhi të forta kanë shkaktuar probleme të shumta në qytetet e Milanos dhe Komos.

Si pasojë e kushteve ekstreme atmosferike, 13 fluturime janë devijuar drejt aeroportit Orio al Serio, në Bergamo, transmeton albinfo.ch.

Autoritetet italiane kanë lëshuar alarm portokalli për stuhi të forta, ndërsa liqeni i Komos ka dalë nga shtrati duke shkaktuar përmbytje në zonat përreth. Gjendja është bërë kritike edhe në pellgun e Sevesos, i cili është aktivizuar për të menaxhuar prurjet e shumta.

Dy familje janë evakuuar në qytetin Lentate për shkak të rrezikut nga përmbytjet, teksa autoritetet vijojnë të monitorojnë situatën ndërsa qytetarët janë këshilluar të shmangin lëvizjet e panevojshme dhe të qëndrojnë të informuar për zhvillimet e mëtejshme.