Sportisti nga Kosova diskualifikohet nga gara në Mal të Zi, bëri shqiponjën

Foto: FB

Gara tradicionale e kërcimeve në ujë nga “Ura e Vezirit” në Podgoricë, e mbajtur të shtunën pas 15 vjetësh, u shënua nga një incident i tensionuar me pjesëmarrësin shqiptar nga Gjakova, Shkëlzen Goqi. Ai u diskualifikua pasi bëri simbolin e shqiponjës dykrenare para se të realizonte kërcimin e tij, transmeton albinfo.ch.

Fishkëllimat dhe reagimet e ashpra nga një pjesë e publikut, përfshirë disa pjesëmarrës dhe organizatorë, u interpretuan si një “provokim” politik dhe kombëtar. Edvald Krniq, fituesi i garës dhe njëri prej organizatorëve, tha se kërkoi diskualifikimin e Goqit, pasi ky i fundit “thyeu rregullat e sjelljes duke shfaqur simbole politike dhe kombëtare”.

Sekretari për sport i Podgoricës, Darko Nikçeviq, konfirmoi vendimin duke theksuar se rregullat e garës nuk lejojnë shfaqjen e simboleve që mund të konsiderohen të papërshtatshme në ngjarjet sportive.

Nga ana e tij, Shkëlzen Goqi ka deklaruar për gazetën KOHA se figura e shqiponjës dykrenare është simbol i zakonshëm i sportistëve shqiptarë gjatë festimeve dhe nuk ka qëllim të provokojë. Ai tha se u përball me reagime negative sidomos nga ana e disa tifozëve serbë dhe se u detyrua të largohet nga gara pas kërcimit të parë perfekt në lartësi 27 metra, transmeton albinfo.ch.

“Malazezët dhe shqiptarët nuk reaguan keq, por serbët ishin ata që acaruan situatën,” tha Goqi, i cili tha gjithashtu se ishte përballur me presione për të hequr veshjet sportive me shqiponjë, por nuk i përfilli ato.

Në Kosovë, dhe veçanërisht në Gjakovë, kërcimet nga lartësia në stilin “dallëndyshe” janë mjaft të njohura dhe të pëlqyera, por ky incident në Podgoricë tregon tensionet e vazhdueshme politike dhe ndikimin e fuqishëm të grupeve serbe në Mal të Zi.

Gara u fitua nga Edvald Krniq, i cili mbajti edhe rolin e organizatorit që ndërmori masa ndaj Goqit, duke i ndaluar pjesëmarrjen në ngjarjet e ardhshme të këtij lloji në Podgoricë, transmeton albinfo.ch.